Chi be mâ imprenda rumantsch?

Linard Martinelli Chi sun quellas persunas chi imprendan rumantsch. E perche imprendna rumantsch? E da che hana plaschair e che vessna jent? Ün pêr dumondas a üna partecipanta ed ad ün partecipant chi s’han partecipà l’on passà tant als cuors intensiva a Scuol ed a Sta. Maria. Duonna Sylviane Thonès es genevrina e sar Robert Zollikofer vain da Lucerna.

Co esa gnü a da quella cha Vus imprendais vallader?
Sylviane Thonès: Meis bap d’eira da Ramosch e Scuol ed eu laiva chattar mias ragischs. In vacanzas illa «Grusaida» a Scuol suna gnü a savair chi dà cuors intensivs da stà a Scuol e per quels am suna annunzchada.
Robert Zollikofer: Eu d’eira in vacanzas in Val Müstair. L’ustera da la «Crusch Alba» a Sta. Maria m’ha tradi, chi saja pussibel dad imprender rumantsch e m’ha cusglià da contactar la Lia Rumantscha. E pac plü tard n’haja lura frequentà meis prüm cuors intensiv.

Scha Vus congualais il cuors a Scuol e Sta. Maria, che dà in ögl?
ST: A Scuol es la partecipaziun da la Svizra tudais-cha uschè ota sco a Sta. Maria. A Sta. Maria es la partecipaziun da la Svizra francesa uschè bassa sco a Scuol… Ils cuors in Val Müstair sun plü familiars, eir perquai cha la partecipaziun es bler plü gronda in Engiadina Bassa.
RZ: Jauer es la lingua chi s’affà il meglder per mai. Esser in Val, cun seis lös pürs ed autentics d’eira vairamaing ün bogn illa cultura viva. Quai am plascha fich bain.

Chenüns sun ils prossems pass per imprender Rumantsch?
ST: Eu partecipess jent a l’eivna «a Sent be rumantsch» e lura cuors da litteratura als cuors intensivs cun quellas bunas persunas d’instrucziun.
RZ: Ün cuors «Be rumantsch», saja quai a Sent o inclur oter illa regiun füss alch fantastic. Daspö duos ons legia cudeschs per rumantsch, eir per incleger meglder la vita in Rumantschia. Daspera lavura sco famagl pro paurs, dal püschain fin a la tschaina. Quai sun temps intensivs per imprender la lingua, ma eir corporalmaing. E lura lessa absolver ün certificat in vallader, B2 o forsa C1, e natüralmaing darcheu ils cuors intensivs. Tuots duos!

Che as giavüschessat Vus, eir da Jauras e dad Engiadinais?
ST: Chi sajan superbis da lur bella lingua. Eu cusgliess a tuot la Svizra francesa da till’imprender perche ch’els nu cugnuoschan amo quista lingua e cultura fantastica!
RZ: Cler, i füss ideal scha amo daplüs discurrissan rumantsch. Ma eu crai cha scha la giuventüm indigena discuorra e daplü glieud giò la Bassa füss consciainta, füssna parderts da promouver la lingua e recugnuoscher cultura da las valladas rumantschas e lur valur pel pajais.

Rumantsch lernen, ja kann man! Es gibt einige Lehrpersonen, die in der Region privat unterrichten. «a Sent be rumantsch» musste leider verschoben werden.
Die Lia Rumantscha bietet sowohl Online- als auch Präsenzkurse in der ganzen Destination an. Auf www.curs.ch finden Sie mehr Informationen dazu. Die Kurse beginnen dreimal im Jahresverlauf, etwa um Ostern die Nächsten.
Daneben finden jeweils in der letzten Juliwoche und in der zweiten Oktoberwoche die Intensivkurse statt.

Das könnte Sie auch interessieren