Ils cuors intensivs d’eiran bain frequentats …
I’ls Cuors intensivs da rumantsch vallader, la fin da lügl da l’on passà a Scuol e dürant las vacanzas da scoula d’october a Müstair, han bundant 200 persunas imprais in 22 classas vallader. Quai sun impustüt persunas da tschellas regiuns linguisticas da la Svizra, eir singuls uffants, e dad our d’pajais cun colliaziuns cun o interess per nossa regiun.
… cun ün program structurà l’avantmezdi ...
Ils cuors cumanzaran eir quist on mincha di intuorn las 9:00 e düraran fin vers las 13:00, uschè chi’s po frequentar dürant quist’eivna intensiva 22 lecziuns da rumantsch. E quai es vairamaing fingià tuot il striögn – bun, i’s sa chi güda da far lezchas. Per pudair spordscher tuot quists cuors dovraina in prüma lingia magistras e magisters chi’ns sustegnan, instruind quellas lecziuns.
Ils cuors cul mez «In lingia directa» fuorman eir il fil cotschen pels cuors intensivs. Ma daspera spordschaina, eir grazcha a la magistraglia ingaschada cuors da principiantas e principiants da «Rumantsch pel minchadi». Implü però eir cuors da rinfrais-ch, da conversaziun e da litteratura per persunas cun bunas e fich bunas cugnuschentschas da la lingua.
E quai es tuottüna bod ün terz da tuot las partecipantas e dals partecipants chi giodan minch’on darcheu üna o dafatta duos eivnas da lingua rumantscha in Engiadina Bassa o in Val Müstair.
… e cun intuorn ils cuors ün program vast.
E schi, per cha las persunas possan far ün bogn in ün ambiaint rumantsch, organisaina minch’on sper ils cuors svess eir ün program accumpagnant. Quel cumpiglia la bunura, avant scoula per schlockiar la gianoscha, chant i’l cor dals cuors.
Davomezdi e/o la saira daja occurrenzas sco guidas, lavuratoris, prelecziuns e natüralmaing nu das-cha mancar la tschaina cumünaivla. Da chattar impustüt per quella, cun raduond la mità dal cuors preschaint, ün local – i’l cumün a Scuol immez la stagiun ota e scha pussibel minch’on ün’otra località – es üna sfida tuot apart. Opür quai chi renda la lavur interessanta.
E sco cha nus dudin qua o là sun ils cuors uschea propcha intensivs. Quai schi lessan partecipar a la sporta intera. Impustüt per principiantas e principiants poja eir dvantar massa bler.
Ed eir quia as dovressa las «famiglias»
Per pudair organisar eschna cuntaints dal sustegn. Nus dovrain magistras e magisters in val. Nus dovrain glieud chi realisescha sportas per gruppas – eir per rumantsch. E nus dovressan, minch’on ün pêr daplü, famiglias o persunas chi dessan a fit üna stanza cun püschain dürant la stagiun ota ed as pigliessan il temp da passar qua o là ün pêr pleds cun las fittadinas ed ils fittadins.
