Id es cuort avant Nadal e las sours schemblinas Sam e Charlie sun vaira agitadas. Sco adüna es Sam statta üna fich brava quist on – e Charlie? Mo bain, per dir la vardà: Charlie es statta üna vaira sfarfatta. Na propa noscha, ma üna VERITABLA LUMPAZZA. Chi sa, sch’ella survain almain ün unic regal? Minchatant (fich d’inrar) sto Santa esser dür. E da las jadas (vairamaing be mincha quattember) fa perfin el ün sbagl ...
Ün cudesch da bellezza per l'intera famiglia
Cull' istorgia da Nadal edischa la Lia Rumantscha (LR) quist on ün cudesch dal cuntschaint autur e scenarist Richard Curtis. «Ün pitschen miracul da Nadal» invida cun umur fin, blera empatia ed ün messagi important da s'approfundir in ün’ istorgia plain tensiun chi tratta la schigliusia e l'amur tanter fradgliuns a moda charina e divertenta. Il cudesch culs grondius disegns in culur da l'illustratura Rebecca Cobb lascha sfuondrar in ün oter muond cultural e permetta uschea eir da tematisar las differentas tradiziuns da Nadal: qua nu porta nempe il bambin ils regals da Nadal, sco pro nus, ma Santa. Cun bocca averta ed ögls glüschaints pon las lecturas ed ils lecturs giuvens seguir a l'istorgia da las duos sours schemblinas Sam e Charlie ed a lur aventüra cun Santa.
L'ediziun da Nadal nun as distingua be tras sia istorgia chi va a cour, ma inchanta eir cun sia grafica na cunvenziunala: las scrittüras grondas e pitschnas fan nempe sigls e cupicharoulas tras il cudesch. L'istorgia divertaivla e chi fa bain il cour animescha ad uffants e creschüts da rier, reflectar e discutar.
Il cudesch lià «Ün pitschen miracul da Nadal» (versiun valladra tradütta da Selina Bisaz) es cumparü in tuot ils idioms ed in rumantsch grischun e cuosta illa vendita CHF 25.00. El po gnir retrat illa butia online da la Lia Rumantscha (liarumantscha.ch/rm/butia), via telefon 081 258 32 22 o illas librarias da la regiun.
Bun divertimaint culla lectüra!
