Il format «Sbrinzlas rumantschas»
Cun üna visita sur mezdi o dürant üna posa laina infuormar, sensibilisar ed animar a differentas gruppaziuns davart la lingua e cultura rumantscha. Implü laina render attent a las pussibiltats da s’infuormar davart la lingua e las sportas da visitar ün dals numerus cuors (detagls: curs.ch/kurse), scumpartir material d’infuormaziun, animar da far adöver dad alch pleds rumantschs o eir il scumpart dad ün glossari.
Gruppas in mera
sun römbels pitschens fin 12 persunas. Quai pon esser gruppas existentas sco firmas, instituziuns o uniuns, ma eir gruppas spontanas chi s’inscuntran individualmaing aposta per la Sbrinzla rumantscha. Las partecipantas e’ls partecipants pon esser tant da lingua materna rumantscha sco eir dad ün’otra lingua. Gruppa in mera pon eir esser instituziuns chi sun prontas da collavurar, saja quai cun metter a disposiziun localitats o cun vulair spordscher ün’ invista i’l rumantsch a lur collavuratur:as o ad ulteriurs interessats.
Per exaimpel in uschedits co-workings illas regiuns sco partenaris da localitats per inscunters individuals, dittas ed instituziuns grondas i’l sectur da sandà, da transport, pendicularas, ouvras electricas, commerzi e mansteranza, bogns ed implants da sport, destinaziuns turisticas ed administraziuns cumünalas, sco input per lur collavuratur:as o eir per persunas nouvrivadas.
Nos referat cuort davart la lingua, la cultura e l’istorgia rumantscha porta schlantsch in vossa posa da mezdi o in vossas occurrenzas da persunal e quai in fuorma locca, simpatica ed autentica. In üna mezz’ ura ed in ün' atmosfera pachifica sensibilisain nus a las partecipantas ed als partecipants pel Rumantsch. Sün giavüsch adattaina gugent singuls cuntgnüts, sco per exaimpel il glossari, a voss interess ed a vossas prioritats.
