Cun totalmaing 602 texts inoltrats in tuot ils idioms i’l chantun Grischun (da quels d’eiran 254 da l’Engiadina e da la Val Müstair) haja dat dal 2025 ün nouv record da partecipaziun. Las scolaras ed ils scolars da la terza fin la 6avla classa han scrit davart il tema «la clav magica» (3./4. classa: 103 texts, 5./6. classa: 79 texts) e pro’ls giuvenils e giuvens creschüts d’eira quai «meis planet fantastic» (7. - 9. classa: 46 texts e 17 - 25 ons: 26 texts).
In minchüna da las 3 regiuns han lura las giurias let tras e valütà tuot ils texts tenor differents criteris. Davo varsaquantas uras da premurusa lectüra e diversas sezzüdas da valütaziun s’haja tschernü per mincha categoria las megldras contribuziuns.
In seguit a la premiaziun virtuala la bunura dals 4 da gün, ingio chi d’eiran preschaint:as online bleras scolaras e scolars da tuot il chantun Grischun, haja dat vers saira in mincha regiun üna festina per surdar ils premis a las victuras ed ils victurs. Per l’Engiadina e la Val Müstair ha la premiaziun da las vendschadras ed il vendschaders illas quatter categorias gnü lö a Zernez i’l auditori dal Parc Naziunal Svizzer.
Dürant quista fich bell’ occurrenza festiva sun gnüdas undradas las victuras ed il victurs (1. - 3. rang) da mincha categoria ed els han surgni da la Lia Rumantscha ün premi in fuorma da raps ed ün regal. Davo las laudatios - prelettas dad üna o ün commember da la giuria - per las 4 vendschadras: Liza Anna Andersag da Scuol cul text «Üna clav chi maina amis» (3./4. classa), Clelia Cadonau da S-chanf cul text «La clev magica» (5avla/6avla classa), Mirta Bott da S-chanf cul text «Mieu planet fantastic - ödi ed amur» (7avla - 9avla classa) e Dajana Ristic da Scuol cul text «Mia via vers l’armonia» (17 - 25 ons) han las poetessas ed ils fabulists das-chü preleger lur texts victurs (rangaziun 1 fin 3) davant il numerus public in sala, chi tils ha tadlà cun bocc’averta, cun gronda superbgia, ota stima e lod. Cun ün chod e grond applaus sun tuot:as gnüd:as onurats:das per lur penna creativa e la grondiusa prestaziun.
Las plazzas 2 e 3 illas quatter categorias han ragiunt:
3./4. classa: Norina Zeller da La Punt Chamues-ch e Leon Steffelbauer da Vulpera
5avla/6avla classa: Anna Schulz da Chapella ed Jonas Pinggera da Cinuos-chel
7avla - 9avla classa: Kora Rothermud/Lara Zanetti da Sent e Livia Melcher/Luisa Ulber da Scuol resp. Segl Baselgia
e pro’ls giuvenils da 17 - 25 ons: Lina Margaritta Salzgeber da S-chanf e Bettina Gottschalk da Zernez.
Scriver es per uffants e giuvenils avantagius our da differents motivs: el nu promouva be lur abiltà linguistica e lur creatività, blerant eir lur svilup cognitiv, la motorica fina e rinforza lur memoria. Ün grond «grazcha fich e cumplimaints» nu va be a quels sül podest, dimpersè a tuot las 602 partecipantas e partecipants chi han tut il temp e’s dat fadia da scriver lur istrogias e poesias creativas, plain fantasia.
