Il parc da divertimaint dad Antonia Bluord ha seis meglders temps davo sai. E quels chi han ün stand sun uschè specials sco raffinats schi va per ignorar prescripziuns e redüer impostas. Ün di survain la scheffa da la plazza da divertimaint üna charta chi avertischa ch’ün revisur saja in viadi pro els. Subit sun tuot ils pertocs in panica. Impustüt cur chi constateschan cha’l revisur es fingià qua – o meglder dit la revisura. Iwana Waser – üna duonna da la cità, cun eleganza e bunas manieras cumpara. Quai cha Antonia Bluord e seis collavuraturs e sias collavuraturas nu san es cha quista signura nun es gnanca quella chi crajan dad avair davant sai …
Desch acturas ed acturs
La gruppa da teater da Scuol giouva «La revisura». I’s tratta dad ün toc in duos acts da Paul Steinmann e Peter Fischli tenor la cumedgia da Nikolai Gogol «Der Revisor». Il toc giouva sülla plazza da divertimaint cun carussel, stand da trar a schaibgia, tren da fantoms, baita da sandwichs, musica dad orgel. Tuot las culissas ha la gruppa da teater fat svessa. «Quista scenaria ans paraiva fich interessanta, id es üna jada alch oter co la stüva da famiglia classica», manaja Anna Mathis Nesa. Insembel cun Tina Puorger es ella respunsabla pella redschia. Desch acturas ed acturs sun sül palc e tuot las persunas giouvan caracters tuot particulars. «Eir quai ans ha plaschü, quista varietà da persunalitats», disch la redschissura. Ella giouva svessa üna rolla principala. «Nus vain quist on eir acturas ed acturs chi fin uossa nu d’eiran activs illa gruppa da teater», quinta la presidenta Seraina Taisch. Bain pussibel ch’üna o l’oter resta eir in avegnir illa società. Üna da las acturas ha dafatta be güsta imprais rumantsch e quai funcziuna stupend sül palc.
La prüma jada in schner
Normalmaing rapreschainta la gruppa da teater Scuol mincha duos ons adüna in november ün nouv toc da teater. Quista jada haja dat collisiuns da termin cun ün’otra gruppa da teater in Engiadina Bassa ed ultra da quai es la sala cumünala adüna fich bain occupada fin avant Nadal. Uschea es nada l’idea da far las rapreschantaziuns mità da schner – in quel temp chi’d es plü quiet, cur cha las festas sun passadas e la stagiun ota in favrer nun ha amo cumanzà. «Il toc es fich divertent ed i vala la paina da gnir a verer», imprometta Seraina Taisch.
