Tanter Rosa e Rigo vaja pellas chosas pitschnas e grondas: pels sentimaints gronds da la mür pitschna e pellas vardats pitschnas dal leopard grond. In 28 istorgias fan ils duos amis ponderaziuns davart temas sco fiduzcha, lungurella, curaschi e bler oter plü. Adüna vaja eir pell'amicizcha. Ün'amicizcha chi'd es uschè «sgiagliada, choda, gronda e grossa» ch'ella nun ha vairamaing gnanca lö in ün cudesch.
L'autur Lorenz Pauli lascha discuorrer a las duos bes-chas in üna maniera grondiusa, cun bler umur e simpatia üna per l'otra. L'illustratura Kathrin Schärer muossa cun purtrets ün'amicizcha chi s-choda il cour eir a creschüts chi prelegian il cudesch. Las istorgias dal zoo e da la vita sun ün'ouvra d'art cumplessiva per leger e verer: purtrets da bellezza ed ün text chi va a fuond.
Il cudesch es adattà per uffants a partir da 5 ons o per uffants chi san leger a partir dad 8 ons.
Lorenz Pauli / Kathrin Schärer Rigo e Rosa. Traducziun valladra Staschia Janett-Guidon. Uniun dals Grischs 2023. ISBN: 978-3-908611-58-5
