Cun üna nouva pagina d'internet survisibla creescha la Lia Rumantscha ün post da consultaziun central per persunas nouvrivadas. La plattafuorma intermediescha in ün möd simpel cugnuschentschas da basa davart la lingua e cultura rumantscha, indicha pussibiltats da cussagliaziun, cuors e contacts, sco eir colliaziuns a sportas e materials existents per as fatschendar davart il rumantsch.
Sensibilisaziun da principi davent
Il Check-in rumantsch procura cha la lingua e la cultura sajan visibels ed accessibels da prüma davent. Quai facilitescha l’integraziun e sdruaglia l’immaint per la valur da la lingua rumantscha. Cun üna sensibilisaziun da principi davent pon persunas nouvrivadas s’orientar e sviluppar üna relaziun positiva culla lingua e la cultura indigena. In quist möd vegn il rumantsch rinforzà sco lingua viva dal minchadi.
Sustegn pels cumüns
Eir ils cumüns pon profitar dal Check-in rumantsch: Els survegnan ün instrumaint chi güda a rinforzar la cultura da bainvgnü e chi facilitescha l’integraziun. Quai demuossa eir la buna e gronda resonanza: sper tuot ils cumüns in Engiadina Bassa e Val Müstair as partecipeschan eir tuot ils ulteriurs cumüns rumantschs o bilings dal Grischun a quista nouva sporta. E grazcha al sustegn dal Uffizi da cumüns vegn il proget «Check-in rumantsch» eir portà dal Chantun.
Daspö il mais november 2025 han ils cumüns plazzà il link a quista sporta sün lur paginas da web. Uschè survegnan tuot las persunas chi vivan da nouv o daspö pac temp in noss cumüns ün access na cumplichà ad infuormaziuns ed a sportas davart la lingua e cultura rumantscha.
Extensiun persistenta e singuls pass venturs
Accumpagnà vegn il Check-in da differentas masüras per stabilir la sporta in ün möd persistent. Quai sun p.ex. ils cuors cumpacts chi intermedieschan ils plü importants aspets dal rumantsch sco eir ils divers «Cafes rumantschs» bain etablits chi pussibilteschan ün barat linguistic cun persunas indigenas. Davo l’introducziun i’ls cumüns extenda la Lia Rumantscha quista sporta eir sün ulteriuras gruppas in mera, sco possessur:as dad abitaziuns secundaras, destinaziuns turisticas sco eir per dittas interessadas.
Laivat savair daplü?
La pagina da web dal «Check-in rumantsch» es accessibla suot il seguaint link:
liarumantscha.ch/de/checkin-rumantsch
... o via code da QR
