Il format Cafè rumantsch (CR)
daja sco proget da la Lia Rumantscha (LR) fingià daspö blers ons in tuot il territori rumantsch, ma eir illa diaspora fin p.ex. giò San Galla, Berna o Basilea. I’l territori vallader sun quists arrandschamaints ün’instituziun, eir perquai cha in nossa regiun sun quai occurrenzas da minch’ eivna e quai nouv o dafatta dudesch mais l’on. Davo la situaziun fich difficila dürant la pandemia da corona – ingio cha ils CR’s fisics nun han pudü avair lö – han las manadras ed ils manaders, provà da mantgnair uschè bler co pussibel ed hozindi s’allegran quels inscunters da gronda popularità.
In nossa regiun han ils Cafels rumantschs lö regularmaing ad Ardez (mincha marcurdi in Chasa cumünala ad Ardez, a las 09:30), a Ftan (mincha seguond marcurdi illa biblioteca cumünala da Ftan, 09:45 - 10:45), a Zernez (duos mardis al mais illa Saletta, chasa da pravenda refuormada, 10:00 – 11:00) ed a Scuol (mincha gövgia i’l hotel Bellaval, da las 10:00 - 11:00).
Il Cafè rumantsch in Val Müstair es eir sün buna via da resüstar.
Sper quai daja plüssas jadas l’on ün Cafè rumantsch virtual in tuot ils idioms.
Ün barat linguistic e cultural
Il Cafè rumantsch po esser üna pütta importanta schi va per integrar seguond-indigen:as o nouv-residents chi vegnan da l’Ungaria, da Friburg, dal Partens o dal cumün vaschin. Cura ed ingio cha’l prossem Cafè rumantsch ha lö, chattais in quist magazin i’l chalender d’occurrenzas/agenda, süllas tablas electronicas in Vossa fracziun, i’l chalender d’arrandschamaints virtual, sün crossiety.app, sülla pagina da web chalender.ch o cun seguir ad @liarumantscha süllas medias socialas.
Dal rest: il Cafè rumantsch es gratuit, be il cafè cha Vus bavais cuosta. Minchün:a chi sa o discuorra jent rumantsch es bainvis:sa … a bainbod.
