EBexpo
Insembel cullas collavuraturas ed ils collavuraturs da Gammeter Media muossain nus da la Lia Rumantscha noss prodots chi’s po «leger» in rumantsch e tudais-ch, ma natüralmaing eir ulteriurs prodots e spüertas supplementaras cha nus spordschain eir illa regiun. Sustegn varana eir da la suprastanza da noss’uniun affiliada in Terra Ladina, l’Uniun dals Grischs. Insembel cull’UdG realisaina eir alch sco üna parada da hits da pleds ladins.
E natüralmaing chi darà la pussibiltà per pitschnas e plü pitschens da pitturar o disegnar la famiglia Babulin, intant cha mamma, bap, nona, bazegner e tuot tschels gronds legian, dumondan, discutan e dan bun cussagl.
Kino culla famiglia Babulin…
…sarà üna sporta cha nus preschantain a l’EBexpo. La prüm’ediziun dal Kino Rumantsch in nossa regiun es statta la mità da favrer i’l Chastè da Cultura a Fuldera, organisà da la Biosfera Val Müstair insembel cun Radiotelevisiun Svizra Rumantscha ed apunta cun nus, la Lia Rumantscha. Quai es stat ün evenimaint gratià cun üna sala plaina d’uffants ed eir creschüts chi tils han accumpagnats. Quista jada preschantaina sper ils films cuorts da la famiglia Babulin eir ils films cuorts cha l’Uniun dals Grischs vaiva edi, sco per exaimpel quels da Ferda e Taisin.
D’utuon prevezzaina da realisar lura daplüssas occurrenzas simlas in tuot las regiuns rumantschas.
Pledpierla ed otra litteratura
In marz ha gnü lö a Nairs ün festival da litteratura neolatina, ingio chi’s ha pudü giodair lirica ladina, ma eir da las linguas paraintas. Sper quist’occurrenza promovain nus pro la Lia Rumantscha eir la litteratura rumantscha giuvna cun realisar mincha duos ons cun Pledpierla / Plima d’aur üna concurrenza da scriver per scolaras e scolars da terza classa insü fin giuvenilas e giuvenils da 25 ons. Infin al termin d’annunzcha sun entrats quist on 168 texts valladers e puters, quai chi’ns fa enormamaing grond plaschair! Quista quantità significha però eir üna lavurada enorma, na be per uffants, giuventüm e lur magistraglia e collegas chi legian e corregian, ma eir per nossa giuria, chi das-chan leger e valütar tuot ils texts inoltrats. La premiaziun varà lö als 31 da mai ed ils texts vendschaders as poja lura leger illa Posta Ladina dürant la prümavaira e la stà. Eir üna bella collavuraziun illa regiun.
Üna schelta da nossas chasas edituras daraja da scuvrir a l’EBexpo. I vala dimena la paina da’ns visitar!
LESEN
Die Lia Rumantscha und Gammeter Media haben einen gemeinsamen Stand an der diesjährigen EBexpo Ende April. Wir, die Mitarbeitenden des Verlagshauses Gammeter Media und der Lia Rumantscha im Engadin / Val Müstair, freuen uns darauf, gedruckte, digitale, akustische sowie visuelle Produkte zeigen zu können. Gerne erklären wir auch weitere unserer Dienstleistungen und Angebote. Wir freuen uns auf interessante, anregende, klärende und informative Gespräche.
